|
Da “EL ME MONDO” di Romano Brusco
Raccolta di poesie dialettali in bardolinese.
El me mondo
Se volesse strucàr
sta brascà dei me ani,
come n’arsìm de ua,
per cavàrghene ‘l sens,
dirìa:
so ‘n pace con mi stess…
e questo l’è dir tant,
ma anca tant
tant poc!…
me sento cossì fora
da sto temp…!
E questo
parchè so ancorà
a quei valori
de na olta
e che adess no i ga
pì sens…
Ma iè valori,
perdo,
che fa de n’omo
n’om,
e no ‘n strument
de sto ‘nsensà progredir
sensa fine!…
Ecco parchè me sento
en pace:
parchè vivo
nel me mondo de na olta
e aspeto,
forsi envan,
che l’m el ritorna
omo,
per conìncerne
che sta vita
la ga…
en sens…
Se fusse en bon pitor
Se fusse en bon pitor
vorìa farme en bel quadret
per figurarme ‘l me paeset,
cossì, come ghe l’ò ‘nde ‘l cor…:
ghe farìa ‘n gran cel asùro,
na gran striscia verda per i monti
e coi pì bei colori dei tramonti,
farìa el lago,…
e drente en sta cornìss de monti,
de sol, de cel e lago,
ghe metarìa sto paeseto caro
come na perla ‘nde la so conchìlia…:
ghe metarìa la cesa co’ le so case vece,
i campanìi e ‘l monumento,
el portesèl co’ le so barche da pescatori drento,
e ‘l pontìl de legn per el bapòr;
ghe metarìa la “preonda”
e la tor che pendi en fianc al Miralago,
e drio a tut el lungolago
destendarìa le robe a sugarse al sol:
ghe metarìa mutande e braghe coi tasséi,
ghe metarìa nissòi, toaie e sugamani,
ghe metarìa i “rematìni” e i reoplàni”
e le done che lava co’ la baréla…
Ghe rimetarìa ancora le so cane,
dal camposportivo fin ai “Mandràci”:
ghe rifarla la “Via baci”
e i ochi che pàscola del Romeo…
E metarìa s-ciàpi de puteleti scalsi
che zuga a bala, al pirlo e coi fuséi…
pescatori che giusta i “ré e i “bardiéi”,
e le done co’i seci che va per acqua…
E su le strade de campagna
piene de pòlver e scarcagné
ghe metarìa la zent che vegni zo a pié
dai monti, a far le spese…
Po’ ghe farìa ‘ncòra tut intorno
sfrisi verdi, rossi, e de celeste e de gialo,
e ‘l paeset che se rifletti, tremolando, zo ‘nde ‘l lago
come na lagrima nei oci d’en putin…
Cossì farìa el me quadret
per ritardarlo col passar dei ani,
e per riviver coi me paesani
nel me mondo de na olta…
|